BARBERYA: SUMBONG NAKO SA BARBERO*
Noel Rama
Civil Engineer-Poet
3rd Prize Winner
Sunstar Superbalita Poetry Writing Contest
- Patupi ko, paputol ko
- Aning mi fly-away.
- I-trim lang ang kilid,
- Panipsi diyutay ang likod.
- Dinhi nako panipsan ang kalaay
- Sa alas tres sa hapon, usahay
- Sa mga higayon maghuot akong
- Ulo sa mga kaspa ug kabalaka.
- Bisan pa magngilo akong ngipon
- Sa siyetihan sa mga gunting, razor
- Labaha ug barberong estorya,
- Anhi moduko ug magpaawot
- Labi nang gibuwagan ko nimo day
- Kay na-turn off ka sa dekolor nakong
- Buhok: gold sa kilid ug copper red
- Sa atubangan hangtud sa tangkugo.
- Nagtoo man gud ko nga in ka sa urog
- Kay sa wa pa ko nimo sugta ingon
- Man ka nga love nimo ang tibuok kong
- Pagkatawo.
- A, pa-flat top ko! Paopaw na lang ko!
- Lahapa ning way hinungdang gugma.
- Ayaw binli bisan usa ka lugas.
- Kanang way makuptan, way mahinumduman.